الخُــــرافة

ورثولنا الخوف وراثة ، علمونا معنى الخُرافة .. قالولنا قول الحق تخريف والوطن جناحاته هش وريش ..لا يقدر يثور ولا يعرف يطير ، قال قدرة يفضل أسير .. مأثور بالبؤس والتطبيل ، تفتحله الباب حالف مايطير .. راقد من كتر الدم والتنظير ، والكلام الكتير وقله الحيلة والحيرة مابين الأصل والصورة .

 أصل الكلام هلفوت ، عاش عمره صعلوك يصرخ بعلو الصوت مابين الحق والموت يسأل عن المسكوت ويسكت على الحق المسلوب .

أصل الحكاية حكاية وطن اتمسخ وأتمسح بكرامته الأرض سلبوا روحه وسرقوا أرضه ومن يومها بطل يبوح ورضي بالمسموح قال علشان يعيش ويبطل يئن وما يسألش عن أصل الحلم وينسى ويصهين على القضية ويحتكم بالفتنة والطائفية ويقولك جماعات إرهابية ومأجورين وممولين وشوية خونة منتفعين . الحكاية أنهم عايزين كل شعب يبقى شعبين ومايبقاش الحلم واحد ويفضل الحق متلون بلون الدم والغم .

يا وطن عارفنا وناكرنا مهما أتنكرت عارفينك ومهما نسيتنا فكرينك وعلى العهد والوعد صاينينك ، الخوف جبان والجبان مالوش مكان ، الطريق واحد والحلم والحق واحد ومن حقنا نحلم ونبادر، نتمنى ونحاول ومهما كان الطريق داعر هنفضل برضو بنفس المشاعر .

 من حقنا نكتب تاريخنا بدمنا ونرسم طريقنا بنفسنا ، نخطط حدود أوطانا فنحفظها وتحفظنا ، وندعى كل يوم ونقول يا حي يا قيوم أحفظنا من جُحد النفوس ومن شر الطريق والخلق وارزقنا الطريق الحق وأملانا بالأمل والنور .

من حقنا نحلم "بوطن" يُبيح الحــــلم .. لا يذبح الحالمون الصادقون كالخراف للحفاظ على الخُرافة والتخاريف